Шаг аазы Шагаа-биле, чонувус!
Хүндүлүг чонум!
Ак-көк дээр адаанда авыралдыг ава Тывавыска шаг-төөгүден бээр аймак-төрел болуп алгаш, омак-хөглүг демдеглеп чораанывыс өндүр улуг Шагаа байырлалын таварыштыр Силер-биле чолукшуп, ал-бодуңарга аас-кежикти, аал-ораныңарга амыр-тайбың амыдыралды, ажыл-ижиңерге чедиишкиннерни Тыва Республиканың Дээди Хуралының (парламентизиниң) өмүнээмден күзээрин чөпшээреп көрүңер!
Үнүп орар от олуттуг кызылсымаар Дагаа чылында бурунгу Тыва черивиске эки болуушкуннар элбек, а думаа-ханаа өршээлдиг-ле болзун деп Силерниң-биле кады йөрээп ор мен!
Бо хонуктарда он-он чылдар иштинде эгин кожа амыдырап, чурттап чоруурувус славян уктуг орус чонувус Масленица байырлалын демдеглеп турар. Оларның байырлалы база Часкы шагның келгениниң демдеглели. Чараш оюн-тоглаалыг, хөглүг Масленица-биле чаңгыс чер-чурттугларывыска база байырдан чедирээли.
Бо хамык чоннуң байырлалдарын сагыш-сеткиливис сергек, хей-аъдывыс бедик уткуп, демдеглеп эрттирээли.
Республиканың бурунгаар хөгжүлдези дээш бир демниг ажылывыс моон-даа соңгаар уламчылаарынга идегеп, чаа үнүп орар Дагаа чылында чаагай күзелдериңер ыяап-ла бүдер болурун күзедим!
Хүндүткел-биле,
ТР-ниң Дээди Хуралының (парламентизиниң) Даргазы К. Даваа