Улуг-Хем кожууннуң Наадым байырлалы
Июль айның 7-8 хүннеринде Улуг-Хем кожууннуң Наадымы оюн-тоглаалыг байырлыг байдалга болуп эрткен. “Белдир-Кежии” деп этно-культурлуг төпке янзы-бүрү тыва мөөрейлерге болгаш ча адарынга, аът чарыжы база тыва хүреш маргылдааларынга улуг-хемчилер болгаш аалчылар идепкейлиг киришкеннер.
Тыва Республиканың Дээди Хуралының (парламентизиниң) Даргазы Кан-оол Тимурович Даваа улуг-хемчилерге 2017 чылдың Наадымы-биле изиг байырын чедиргеш, ажыл-ижиниң чедиишкиннери-биле онзаланып келген малчыннарга болгаш көдээ ишчилерге Тыва Республиканың Дээди Хуралының Хүндүлүг бижиктерин тывыскан:
- Улуг-Хем кожуун - Тывавыстың бодунуу-биле база бир тускай онзагай чараш чурумалдыг, улуг төөгүлүг, алдар-аттыг ажыл-ишчи чоннуг кожууннарының бирээзи. Чуртувустуң сайзыралының төөгүзүнде кирген Улуг-Хем чурттуг ат-сураглыг эртемденнер, чогаалчылар, ыраажылар болгаш удуртукчуларны маңаа хөйү-биле адап, демдеглеп болур бис.
Амгы үеде база Улуг-Хем кожууннуң биче бүдүрүкчүлери, сайгарлыкчыларывыс болгаш малчыннарывыс боттарының ажыл-ижин улам сайзырадып, чылдан чылче багай эвес көргүзүглерни чедип ап, республикавыстың экономиказының хөгжүлдезинге үлүг-хуузун киирип чоруур. Ындыг болганда бөгүн кожууннуң Наадым байырлалы бүгү чонувустуң демниг чоруун улам быжыглаарынга, ажыл-иштиң чедиишкиннерин түңнээринге, моон-даа соңгаар салдынган сорулгаларны боттандырарынга улуг идигни бээр ужурлуг.
Ынчангаш Улуг-Хем кожууннуң көдээ ажыл-агый адырының эрес-кежээ, бурунгаар чүткүлдүг ажыл-ишчи арат-чонунуң байырлалын таварыштыр төрээн Тывавыстың хөгжүлдези дээш кылып чоруур бүгү-ле ажыл-ижиңер дээш өөрүп четтиргенивисти илередип, Силерге каң дег кадыкшылды, аас-кежикти, бедик хей-аътты болгаш чымыштыг ижиңерге моон-даа соңгаар чедиишкиннерни күзедим!