Тыва Республиканың Чаан мөгези С-Б. Түлүш Наадым 2017-ниң тиилекчизи болган
Малчыннарның болгаш көдээ ишчилерниң байырлалы - 2017 чылдың Наадымы чаңчыл езугаар тыва хүреш маргылдаазы-биле доозулган.
Тыва Республиканың Баштыңы Шолбан Кара-оолдуң байыр чедириишкини-биле 180 мөгениң хүрежи эгелээн.
Чеди шак дургузунда үргүлчүлээн хүреш маргылдаазының түңнелинде, Тыва Республиканың Чаан мөгези Сайын-Белек Түлүш Тыва Республиканың Чаан мөгези Эрес Кара-Салды октааш, Наадым байырлалдарының үш дакпыр тиилекчизи болган.
Тыва Республиканың Арзылаң мөгези Ай-Демир Монгуш болгаш Тыва Республиканың Начын мөгези Сылдыс Монгуш үшкү-дөрткү черлерни үлешкеннер.
Сес шыырак мөгелерниң аразынче ийи дугаар кирип келгени-биле Тыва Республиканың Наадымнарынга 18 харлыг мөгелер хүрежинге үш дакпыр шүгген Баткар Баазаң Тыва Республиканың Начын мөгези деп хүндүлүг атты эдилээр эргени чаалап алган.
Тыва Республиканың Дээди Хуралының (парламентизиниң) Даргазы К. Даваа шүгген мөге Сайын-Белек Түлүшке изиг байырын чедиргеш, “Лада Гранта” автомашинаны тывыскан.