Кур-Чер сумузунда Шагаа байырлалы
Бөгүн, февраль 14-те, Тыва Республиканың Дээди Хуралының (парламентизиниң) Даргазы Кан-оол Тимурович Даваа Кызыл кожууннуң Кур-Чер сумузунуң малчыннарының Шагаа байырлалынга четкеш, Тыва Республиканың Баштыңы Шолбан Валерьевич Кара-оолдуң болгаш Дээди Хуралдың депутаттарының мурнундан изиг байырын чедирген.
Ол үнүп орар чер олуттуг сарыг Ыт чылында Шагаа байырлаан кижи бүрүзүнге каң дег кадыкшылды, аас-кежикти болгаш ажыл-ижинге чедиишкиннерни күзээн. Малчыннарга мал-маганын онча-менди өстүрүп, соок кыш адакталган-даа болза, час узун бооп болур, ынчангаш черле сула салдынмайн, кызымак болгаш шыдамык боорун күзээш, хоочун малчыннар-биле чолукшулга езулалын кылган.
Кызыл кожууннуң чагырга даргазының оралакчылары Ушпас Борисович Куулар биле Леонид Кызыл-оолович Ховалыг кожуунда Шагаа байырлалын баштай эрттирип турар Кур-Чер сумузунуң малчыннарының идепкейин демдеглеп, келир чаа чылда шуптузунга эң эки күзээшкиннерни йөрээгеш, кожуун чагыргазының шаңналынга төлептиг болган көдээ ишчилерге Хүндүлүг бижиктерни тывысканнар.
Кур-Чер сумузунуң баштыңы - Төлээлекчилер хуралының даргазы Аяс Александрович Оюн болгаш чагырга даргазы Андрей Васильевич Янчат база шагаалап келген аалчыларга болгаш чыылган чонга байыр чедиргеш, сумунуң кезек мурнакчы малчыннарын, кадарчыларын тус черниң Хүндүлүг бижиктери-биле шаңнаан.
Бо чылын Шагаа Кур-Чер сумузунуң малчыны Каң-оол Норбуевич Кууларның аалынга ээлчег аайы-биле болган. Байырлап келген чон хөл-шыдыраа, буга-шыдыраа, тевек, баг тыртыжары, аът эзертээринге, бардамнажырынга болгаш кожамыктап ырлажырынга мөөрейлежип, эки ойнап, хөглеп алганнар.