Алдар аттыг спортчу клуб ажыттынган
Дүүн, май 23-те, Тыва Республиканың Дээди Хуралының (парламентизиниң) Даргазы Кан-оол Тимурович Даваа, “Чангыс демниг Россия” партиязының Даргазы Д. Медведевтиң Тыва Республикада чон хүлээп алыр чериниң удуртукчузу Өнер Хүлерович Ондар Кызылдың 9 дугаар гимназиязында Алдар аттыг спортчу клубтуң байырлыг ажыдыышкынынга киришкеннер.
Тыва Республиканың Чазааның Баштыңы Шолбан Валерьевич Кара-оол тыва хүрешти сайзырадыр сорулга-биле ажыттынган спортчу клубту деткип, ону тургускан Тыва Республиканың Чаан мөгези Эрес Кара-Салга болгаш ооң-биле демнешкен чонунга республиканың сайзыралынга база бир дузалыг үүлени кылганын илередип, моон-даа соңгаар эки чедиишкиннерлиг ажылдыг болурун күзээн.
Клубтуң ажыдыышкынынга келген мөгелер, хөгжүмчүлер болгаш оолдарын эдертип келген адалар-биле удуртукчуларның аразынга ужуражылга база болган. Аңаа чүгле тыва хүрешке хамаарылгалыг айтырыгларны эвес, а ниитизи-биле эр кижиниң мөзү-шынарынга хамаарыштыр база чугааларны кылганнар.