Депутаттар “Сөөлгү коңга” байырлалдарынга киришкеннер
Дүүн, май 23-те, Тыва Республиканың Дээди Хуралының депутаттары республиканың школаларының сөөлгү коңга байырлалдарынга киржип, тыва парламентиниң мурнундан изиг байырын чедирбишаан, доозукчуларга шылгалдаларны эки дужаап алырын, Тыва чуртувусту алдаржыдар төлептиг оолдар, кыстар болурун күзеп, оларны өөредип, кижизидип өстүрген башкыларга өөрүп четтириишкинни илереткеннер.
“Хүндүлүг доозукчулар! Бөгүн силерниң амыдыралыңарда эртем-билигниң бирги болгаш эң чугула чадазы доозулган. Бо «коңгажыгаштың» уяранчыг үнү силерге, бир талазында, өөрүнчүг, өске талазында, муңгаранчыг болуру чугаажок, чүге дизе, силер кижиниң чуртталгазында эң-не солун школачы чалыы чараш үе-биле чарлып турарыңарның демдээ-дир. Ынчалза-даа бо коңганың ыыды силерниң школачы чорааш эрттирген эң-не онзагай чараш болуушкуннарыңар-биле сагыш-сеткилиңерге кезээде балалбас сактыышкын болуп артып калыр.
Силерниң мурнуңарда моон соңгаар-даа дээди болгаш ортумак өөредилге черлеринче кирип, эртем-техниканың чаа-чаа ажыдыышкыннарын кылыр салым-чолуңарның делгем оруу ажыттынып турар. Башкыларыңарның берген билиин болгаш угаанныг арга-сүмезин амыдыралга моон-даа соңгаар чедиишкинниг ажыглаарыңарны күзедивис.
Бо чараш байырлал-биле чергелештир кичээлдерни бедик шынарлыг кылдыр эрттирер, доостурар өөреникчилеринге быжыг билигни бээр дээш тывызыксыг дилээшкиннер-биле ажылдап турган башкыларга, база ажы-төлүнүң өөредилгези болгаш кижизидилгези дээш хүнден-хүнче улуг сагыш салыышкынны кылып турган ада-иелерге моон-даа соңгаар аас-кежикти, каң дег кадыкшылды, ажыл-ижинге чедиишкиннерни күзедивис!” – деп, депутаттар йөрээп турганнар.