Баян-Тала суурнуң 90 харлаанынга тураскааткан байырлалдар эгелээн
Дүүн, сентябрь 21-де, Чөөн-Хемчик кожууннуң Баян-Тала сумузунуң тургустунгандан бээр 90 чыл болган оюнуң байырлыг ажыдыышкыны болган.Сумузунуң байырлалы-биле кады ол-ла суурнуң ортумак школазының 80 чылы, «Хадыңчыгаш» уруглар садының, «Дамба-Доржу Сат» культура төвүнүң болгаш библиотеказының 50 чыл болган байырлалдарын база хары угда дем-биле эрттиргеннер.
Тыва Республиканың Дээди Хуралының (парламентизиниң) Даргазы Кан-оол Тимурович Даваа, депутаттар Александра Хаяаевна Донгак, Седен-Очур Павлович Кара-Сал болгаш «Чангыс демниг Россия» партиязының Даргазы Д. Медведевтиң Тыва Республикада чон хүлээп алыр чериниң удуртукчузу Өнер Хүлерович Ондар байырлыг ажыдыышкынга Баян-Тала суурнуң ажыл-ишчи чонунга изиг байырын чедирип, суй-белектерин сунуп, эки үре-түңнелдиг ажылдап чоруур ажылдакчыларга Дээди Хуралдың Хүндүлүг бижиктерин база тывысканнар.