Чаа-Хөл кожуунга Арзылаң мөгениң байырлалы болган
Дүүн, сентябрь 21-де, Тыва Республиканың Дээди Хуралының (парламентизиниң) Даргазы Кан-оол Тимурович Даваа Чаа-Хөл кожуунга Тыва Республиканың Чаан мөгези Отчурчап Айдыңның шаңналы дээш болуп эрткен байырлыг хемчеглерге хүндүлүг аалчы бооп четкеш, Тыва Республиканың Чазааның Баштыңы Шолбан Валерьевич Кара-оол-биле Чаа-Хөлдүң чонунга Арзылаң мөгелиг болганы-биле изиг байырын чедирип, ооң изин салгаан аныяк мөгелер Чаа-Хөл кожуундан моон-даа соңгаар үнүп-ле турзун деп йөрээп, күрүне чергелиг бедик атты кызыл дерин төп чорааш, чаалап алганы дээш, Отчурчап Айдыңга белек-селээн сөңнээннер.
Тыва Республиканың Дээди Хуралының (парламентизиниң) Аграр политиказы, чер, өнчү хамаарылгалары болгаш экология талазы-биле комитединиң даргазы, Тыва Республиканың Арзылаң мөгези Радислав Николаевич Наважап база байыр чедириишкинин кылгаш, Отчурчап Айдыңның тренер башкыларынга Тыва Республиканың Дээди Хуралының (парламентизиниң) Өөрүп четтириишкин бижиктерин тудускан.
Арзылаңның кежиин үлешкен тыва хүреш маргылдаазы бедик деңнелге эрткен. Түңнелинде Тыва Республиканың Начын мөгези Сылдыс Монгуш Тыва Республиканың Начын мөгези Баткар Баазыңны октааш шүглүп үнген.