Ак-Дуруг сумузунуң Субурганы 10 чылдаан
Cентябрь 29-та Чаа-Хөл кожууннуң Ак-Дуруг сумузунуң чурттакчы чону демнежип тудуп алганы Субурганының тургустунганындан бээр 10 чыл болган оюн байырлааннар.
Тыва Республиканың Дээди Хуралының (парламентизиниң) Айыыл чок чорук, корум-чурум болгаш кызыгаар чоогунуң айтырыгларының талазы-биле комитединиң даргазы Виталий Монгушевич Бартына-Сады келген чонга байырын чедиргеш, Тыва Республиканың Камбы Ламазы Лопсан Чамзы башкыга төрээн чонунга сарыг шажынның өөредиин дамчыдып берип чорууру дээш, өөрүп четтиргенин база илереткен:
- Ыдыктыг Субурган бистиң суурувусту болгаш чурттакчы чонну хай-бачыт, аарыг-аржык болгаш өске-даа кара күштерден камгалап чоруур дээрзинге бүзүрээр-дир мен.
Улуг-биче чонувустуң хүн-бүрүде маңаа кээп тейлеп, келир үеже бүзүрелин күштелдирип, хей-аъдын бедидип, күзелдери бүдүп чорзун, аас-кежик доктаап турзун дээш чүдүп чоруурун көргеш, сеткилимниң ханызындан өөрүп тур мен.
Шак ынчалдыр келир үеже улуг бүзүрелдиг, аравыста эптиг-найыралдыг, ажыл-ишке демниг чоруур болзувусса-ла, төрээн чуртувустуң сайзыралынга улуг үлүг-хуувус киирип чоруурувус ол болур – дээш, Виталий Монгушевич лама-башкыларга эң эки күзээшкиннерин йөрээгеш, ак кадактарын сунган.