Александра Донгак Сүт-Хөл кожуунга чораан
Тыва Республиканың Дээди Хуралының (парламентизиниң) Саң-хөө, экономика, инвестиция политиказы болгаш сайгарлыкчы чорук талазы-биле комитединиң даргазы Александра Хаяаевна Донгак Шагаа байырлалдарында Сүт-Хөл кожууннуң Ак-Даш сумузунуң Чиңге-Хову деп черинде губернаторлуг төлевилелдиң киржикчилериниң аалынга чедип, аныяк малчыннар-биле ужурашкан.
Аныяк малчыннарның аалында ажыл-агый кидин-түлүк, оолдаашкын үези чоруп турар болган. Аныяктарның мал ажылынга тура-соруу күштүг, ажыл-агыйынга шын сеткили-биле бердинген дээрзи оларның ажаап-дежээп турар анай-хураганнарының арыг-силиинден, тодуг-шыыраандан-на көстүп турган. Шак мындыг төлевилелди тургузуп, аныяк өг-бүлелерге малчын амыдыралче орукту ажыдып, улуг деткимчени чедирип турары дээш Тыва Республиканың Чазаанга база өөрүп четтиргенин илередип турганнар.