Хол бөмбүүнге солун маргылдаа эрткен
Дүүн, февраль 16-да, Шагаан-Арыг хоорайның № 2 ортумак школазының, Тыва тудуг техникумунуң салбырының база Арыг-Үзүү суурнуң спортчу залдарынга Валентин Монгушевич Папий-оолдуң чырык адынга тураскааткан хоочун эр ойнакчылар аразынга 2-ги республика чергелиг хөл бөмбүүнге маргылдааны төрелдери, эш-өөрү бедик деңнелге эрттирген.
Тыва Республиканың Дээди Хуралының (парламентизиниң) Даргазы К.Т. Даваа маргылдаага хүндүлүг аалчы болуп киришкеш, оюннар эгезинде киржикчилерге Тыва Республиканың Баштыңы Ш.В. Кара-оолдуң мурнундан изиг байыр чедиргеш, спортчу чедиишкиннерни күзээн. Кан-оол Тимурович Красноярск хоорайга февраль 21-де эртер ча адарының маргылдаазынга Улуг-Хем кожуундан киржир ча адыкчыларынга материалдыг дузаны чедирген.
Хол бөмбүүнүң маргылдаазынга Тес-Хем, Эрзин, Чаа-Хөл, Чеди-Хөл, Чөөн-Хемчик, Бии-Хем кожууннарның, Шагаан-Арыг хоорайның, Арыг-Үзүү, Эйлиг-Хем, Арыскан суурларның, «Дөгээ», «Мажалык», «Хемчик» болгаш Каайлы чериниң командалары ойнаан. Оларның аразындан бирги черни кожууннар аразының «Мажалык» чыынды командазы ээлээн. Ийиги черге Шагаан-Арыг хоорайның, а үшкү черге Бии-Хем кожууннуң командалары төлептиг болган.
Тиилекчи болгаш өске-даа шаңналдыг черлерни алган командаларга кубоктарны, дипломнарны болгаш өртектиг шаңналдарны тывыскан. Маргылдааның киржикчилери ээлчеглиг оюннарны бедик деңнелге организастап эрттиргени дээш республиканың эң шыырак дээн хол бөмбүкчүлериниң бирээзи чораан В.М. Папий-оолдуң хөй санныг дөргүл-төрелдеринге өөрүп четтиргенин илереткеннер.