Верховный Хурал (парламент) Республики Тыва

Официальный сайт search.png   vkontakte   facebook   twitter

Радислав Наважап Барыын-Хемчик болгаш Бай-Тайга кожууннарга чораан

01 апреля 2019 - 07:27

Март 29, 30 хүннеринде Тыва Республиканың Дээди Хуралының (парламентизиниң) Аграр политиказы, чер, өнчү хамаарылгалары болгаш экология талазы-биле комитединиң даргазы Радислав Николаевич Наважап Барыын-Хемчик болгаш Бай-Тайга кожууннарже ажылчын үнүүшкүннү кылган. 

Барыын-Хемчик кожууннуң көдээ ажыл-агый талазы-биле удуртукчулары-биле болгаш "Аныяк малчыннарга-кыштаг" төлевилелдиң 2017 чылгы киржикчизи Буян Салчак-биле ужуражылганы кылган.

Аныяк малчынның аал-оранында байдалдары-биле таныжып, арга-сүмелерин берген. Хүлээнип алган хойлары эки өзүп көвүдеп турарын депутатка аныяк малчын дыңнатпышаан, чаңгыс-ла бүдүрүп чадап турар айтырыы кудук бооп турар дээрзин илереткен. 

Радислав Николаевич кожууннуң удуртукчуларындан малчыннарга эң кол херек чүүл кудук болганда, дузазын кадар аргазын дарый өөренип көөрүн дилээн. Бөлүк турар кыштагларга ниити ажыглаар чаңгыс кудук кагар аргазын база саналдаан.

Шак ол ышкаш кожууннуң ниити көдээ ажыл-агыйының, часкы тарылганың байдалдарын база өөренип көргеш, республика деңнелинге шиитпирлээр хире айтырыгларны демдеглеп алган.

Эрткен чылын Македонияга хоочуннар аразынга болуп эрткен хостуг хүрешке делегей маргылдаазынга алдын медальды чаалап алган Даржаа Самдар-оолдуң шаңналы дээш хоочуннар аразынга хостуг хүреш маргылдаазы Бай-Тайга кожуунга болган.

Тыва Республиканың Дээди Хуралының (парламентизиниң) болгаш Тыва Республиканың хостуг хүреш федерациязының мурнундан келген аалчыларга болгаш хоочун мөгелерге Радислав Николаевич изиг байырын чедирип тура, хоочуннар аразынга хостуг хүреш маргылдаазын эрттирериниң ажык дузазы дыка улуг, чүге дизе хоочун мөгелер шак мындыг маргылдаарның дузазы-биле боттарының аразында күш-шыдалын кезээде шенежип, арга-дуржулгазын үргүлчү утпайн сактып, аныяк салгалга улуг үлегер-чижээн көргүзүп чоруур боор дээрзин база Радислав Наважап демдеглевишаан, Бай-Тайга кожууннуң удуртукчуларынга болгаш Даржаа Самдар-оолдуң өг-бүлезинге каң кадык чорук болгаш күш-культураны сайзырадырынга улуг үлүг-хуузун киирип, республика чергелиг маргылдааны бедик деңнелде эрттирип турары дээш өөрүп четтиргенин база илереткен.



Возврат к списку