Каа-Хем кожууннуң төлээлери ырак-узак Мөңгүн-Тайга кожуунга чорааннар
Апрель 16-да, Тыва Республиканың Дээди Хуралының (парламентизиниң) Эрге-чагырганың федералдыг органнары, тус чер бот-башкарылга органнары, хамааты ниитилелдиң институттары-биле кады ажыл чорудар болгаш информастыг политика талазы-биле комитединиң Даргазы Юрий Валерьевич Кара-оол болгаш социал политика талазы-биле комитединиң даргазының оралакчызы Ульяна Байыр-ооловна Монгуш Мөңгүн-Тайга кожууннуң Мугур-Аксы сумузунга чон-биле ужуражылгаларны кылганнар.
Мугур-Аксы сумузунда чаа салдынып турар “Хевел” аттыг компанияның хүн херели-биле чемгертинер немелде электри дамчыдылгазында тургустунуп турар айтырыгларны болгаш биче бүдүрүлгелерниң ажыл-чорудулгаларының байдалдарын өөренип көргеннер.
Мугур-Аксының уруглар садының ажыл-ижи-биле база таныштырганнар. Уруглар сады боттары тускайлаң мал-маганныг-даа, хлеб быжырар черлиг-даа болган. Мал-маганны азырап, эът, сүт-биле хандыртынмышаан, хлеб быжырар черинде база хлебтерни быжырып, чүгле боттарын эвес, а харын сумунуң чурттакчыларында база садып турарын болгаш чылыг серизинде ногааны база тарып өстүрүп, уругларга ооң-биле чаагай чемнерни белеткеп берип турарын дыңнатканнар.
Мөңгүн-Тайга кожуунга туризмни база сайзырадыры эргежок чугула дээрзин база чугаалашпышаан, арга-сүме кылдыр Каа-Хем кожууннуң төлээлери боттарының кожуунунда туризмни канчаар сайзырадып турары-биле база таныштырылганы кылганнар.
Моон-даа соңгаар бүгү талалар-биле ийи кожуун аразында сырый харылзаалыг, бот-боттарынга дузалыг кылдыр кады ажылдаарының дугайында тускай езулал езугаар дугуржулганы база кылганнар. Мөңгүн-Тайга кожууннуң Төлээлекчилер хуралының Баштыңы Сандро Өргеевич Салчак биле Каа-Хем кожууннуң Төлээлекчилер хуралының Баштыңы Олег Васильевич Коржевский аттарны тускай дугуржулгага салганнар.
Ужуражылганың төнчү кезээ байырлыг концерт-биле доозулган. Аңаа ийи таланың салым-чаяанныглары белеткеп алган көрүлделерин удур-дедир бараалгатканнар.