Депутаттар чылгычыларга байырын чедиргеннер
Апрель 20-де Чөөн-Хемчик кожууннуң Бора-Булак ховузунга чылдың болур часкы аът чарыжының байырлалы бо удаада Бай-Тайга болгаш Барыын-Хемчик кожууннарның деткимчези-биле болган.
Тыва Республиканың Дээди Хуралының Эрге-чагырганың федералдыг органнары, тус чер бот-башкарылга органнары, хамааты ниитилелдиң институттары-биле кады ажыл чорудар болгаш информастыг политика талазы-биле комитединиң даргазы Юрий Валерьевич Кара-оол, Энергетика, тудуг, транспорт болгаш чуртталга-коммунал ажыл-агыйының талазы-биле комитединиң даргазы Алдын-кыс Темир-ооловна Конгар болгаш “Чаңгыс демниг Россия” партияның Даргазы Д. Медведевтиң Тыва Республикада чон хүлээп алыр чериниң удуртукчузу Өнер Хүлерович Ондар тыва парламентинин мурнундан аът чарыжын сонуургап келген чонга изиг байырын чедирип, ол-бо кожууннарның төлээлери-биле ужуражылгаларны кылганнар.
Шупту салыгларга ниитизи-биле 420 аът киришкен. Аът чарыжы - аныяк чыраа аъттар, чоруктуг чаваалар, чүгүрүк чаваалар, улуг чыраа аъттар, тыва аъттар, аскырлар болгаш орус аъттар деп 7 аңгы хевирге болган. Эң кол шаңналдарга Бии-Хем кожууннуң аъттары төлептиг болганнар.
Тыва Республиканың күш-культура сайыды Субудай Радиславович Монгуш, Тыва хүреш федерацияның президентизи Анатолий Партизанович Дамба-Хуурактың удуртулгазы-биле тыва хүрештиң мөгелери аът чарыжынга кээп, аъттарны үндүрер черинге чурумну тутчуп берип турганын Аът федерациязының президентизи Таймир Владимирович Сарыглар онза демдеглеп, оларга өөрүп четтиргенин база илереткен.
Келир чылын Бора-Булак ховузунуң чаңчыл болган аът чырыжын эрттирер эргени Мөңгүн-Тайга биле Ак-Довурак хоорайның төлээлери хүлээнип алган.