Өнер Ондар Сүт-Хөл чонунга байырын чедирген
Бөгүн, май 1-де, Сүт-Хөл кожууннуң ажыл-ишчи чону частың болгаш күш-ажылдың байырлалын демдеглеп, байырлыг чыскаалды болгаш республика наадымының 4 дакпыр тиилекчизи Дапыл Аныянович Ооржактың мемориалдыг самбыразының ажыдыышкынынга тураскааткан 128 мөгениң хүрежин база эрттиргеннер.
Тыва Республиканың Дээди Хуралының (парламентизиниң) Аппарадының удуртукчузу, “Чаңгыс демниг Россия” партияның Даргазы Д. Медведевтиң Тыва Республикада хөй-ниити хүлээп алыр чериниң удуртукчузу Өнер Хүлерович Ондар Делегейниң ажыл-ишчи чоннарының эп-сеткил каттыштырылгазының хүнү-биле Тыва Республиканың Дээди Хуралының (парламентизиниң) Даргазы Кан-оол Тимуровичиниң өмүнээзинден болгаш “Чаңгыс демниг Россия” партияның мурнундан Сүт-Хөл кожууннуң чонунга изиг байырын чедирген.
Күш-ажылы-биле төрээн чонунуң аразында хүндүткелдиг апарган кижилерни демдеглевишаан, Өнер Хүлерович Ондар аныяк салгалды оларны дөзеп, ажыл-иш дээрге кижи бүрүзүнүң каасталгазы, аас-кежии болгаш келир үези деп чүүлдү кезээде утпайн, ажыл-иштен кажан-даа ойталавайн, кызымак, бурунгаар чүткүлдүг чоруурунче кыйгырыгны кылган.