Кан-оол Даваа чараш хүрештиг аныяк мөгеге тускай шаңнал тывыскан
Дүүн, май 1-де, Частың болгаш Күш-ажылдың байырлалының хүнүнде Шагаан-Арыг хоорайга «Улуг-Хем» солуннуң шаңналы дээш болуп эрткен тыва хүрешке 64 мөгениң чараш хүрежин чон сонуургап көрген.
Республиканың аңгы-аңгы кожууннарындан күрүне ады албаан кончуг шыырак мөгелер аңаа киришкен. Хүрештиң хүндүлүг аалчылары: Тыва Республиканың Дээди Хуралының (парламентизиниң) Даргазы Каң-оол Тимурович Даваа, афган дайынының хоочуну Леонид Валерьевич Кара-оол улуг-хемчилерге байыр чедиргеннер. Каң-оол Тимурович ТР-ниң Баштыңы Шолбан Кара-оолдуң, Дээди Хуралдың мурнундан аарыкчыларга, мөгелерге байыр чедирген. Оон аныяк мөгелерге чараш тиилелгени күзеп, Улуг-Хем кожууннуң кончуг шыырак мөгелериниң бирээзи Экер Кыргыстың чараш хүрежирин, эзир девиин самнап турары бир тускай кайгамчык чараш болганын демдеглеп, бодунуң өмүнээзинден аныяк мөгени телевизор-биле деткип шаңнаан.
Алдыгы салыгже кирген мөгелерден Кыргыс Экер, Оюн Тайлун 3-4-кү черлерни үлешкен, Өвүрнүң мөгези Доржукай Март-оол үжүүрлешкен, Барыын-Хемчиктиң кончуг шыырак мөгези Куулар Даш «Улуг-Хем» солуннуң шаңналы дээш хүрештиң 2019 чылда тергиин мөгези болуп, шүглүп үнген.
Мөгелерге акша шаңналдарын, Хүндүлүг бижиктерни болгаш медальдарны тывыскан.