“Хүреш” стадиону бо чылгы баштайгы хүреш маргылдаазын эрттирген
Бөгүн, май 2-де, Тыва Республиканың Дээди Хуралының (парламентизиниң) Даргазы Кан-оол Тимурович Даваа Кызыл хоорайның “Хүреш” аттыг стадионунуң ажыдыышкынынга тураскааткан тыва хүреш маргылдаазынга хүндүлүг аалчы болуп четкен.
Хөй-хөй төөгүлүг хүрештерниң болган чери, тыва чоннуң ынак оюну тыва хүрешти эрттиреринге таарымчалыг кылдыр кылдынган “Хүреш” стадионунуң бо чылын баштайгы хүрежин эрттирип турары-биле Тыва Республиканың Чазааның Даргазы Шолбан Валерьевичиниң өмүнээзинден болгаш Тыва Республиканың Дээди Хуралының (парламентизиниң) мурнундан Кан-оол Тимурович часкы тарылга хүннери чеже-даа чай чок болза, тыва хүрешти деткип келген аарыкчы чонга, тыва болгаш моол мөгелерге, база чоокта чаа Тыва Республиканың Начын мөгези деп хүндүлүг атты алган Айдың Монгушка изиг байырын чедирген.
Ниитизи-биле 89 мөгелер хүрешкеннер. Түңнелинде Моол күрүнениң Увс аймааның Начын мөгези Аззия Тувдэндорж шүүлген, Тыва Республиканың Начын мөгези Айдың Монгуш үжүүрлешкен. Тыва Республиканың Чаан мөгези Сайын-Белек Түлүш биле Өвүрнүң аныяк мөгези Сай-Даш Монгуш үшкү-дөрткү черлерни үлешкеннер.