Сумуларда часкы тарылга үези
Бөгүн, май 23-те, Тыва Республиканың Дээди Хуралының (парламентизиниң) Даргазы Кан-оол Тимурович Даваа Кызыл кожууннуң Усть-Элегест болгаш Улуг-Хем кожууннуң Хайыракан сумуларының чагырга черлеринге чедип, удуртукчулар-биле ужуражып, часкы тарылгалар үезиниң байдалдары-биле таныжып көрген.
Чагырга черлериниң ажылдакчылары сумузунда часкы тарылга дээш кандыг хемчеглер чоруттунуп турары-биле таныштырбышаан, хөй ажы-төлдүг өг-бүлелерге, кадыы багай, азы чааскаан чурттап турар улуг назылыг кижилерге үрезин-биле кайы-хире дузаламчы кылып турарын база дыңнатканнар.
Кан-оол Тимурович шиитпирлежир хире кандыг берге айтырыглар ук сумуларда барын айтырып, дараазында кандыг угланыышкынныг ажылдаарынга хамаарыштыр база арга-сүмелерин берген.