Кан-оол Даваа Улуг-Хем кожуунга чораан
Бөгүн, май 25-те, Тыва Республиканың Дээди Хуралының (парламентизиниң) Даргазы Кан-оол Тимурович Даваа Улуг-Хем кожуунче ажылчын үнүүшкүннү кылган.
Филология эртемнериниң доктору Каадыр-оол Алексеевич Бичелдейниң тургузуп турары “Белдир-Кежии” деп черде этно-культурлуг музейниң байырлыг ажыдыышкынынга чедип, Тыва Республиканың Чазааның Баштыңы Шолбан Валерьевич Кара-оолдуң өмүнээзинден болгаш Тыва Республиканың Дээди Хуралының (парламентизиниң) мурнундан даштыкы чурттардан келген аалчыларга болгаш чыглып келген чонга төөгүлүг болуушкун-биле изиг байырын чедирген.
Тыва Республиканың Алдан-Маадыр аттыг чурт-шинчилел музейиниң тургустунганындан тура 90 чыл болган ою-биле байырын чедирип, музейниң ажылдакчыларынга буянныг ажылы дээш өөрүп четтиргенин база илереткен.
Тываның төөгүзүн аныяк салгалдарывыс кезээде үнелеп, билип чоруурунга ужур-дузалыг ажык дээр адаанда национал музейниң салбырын ажыдып турарын база онзалап демдеглеп, ону оон-даа улам сайзырадырынга үлүг-хуузун киирерин эртем ажылдакчыларынга болгаш бүгү-ле сонуургалдыг чонга кыйгырыгны кылган.
Байырлыг ажыдыышкын соонда Кан-оол Тимурович Улуг-Хем кожууннуң Чодураа сумузунга база чедип, суурнуң ажыл-ижин сонуургап көрген.
Сумунуң чонунуң боттарының күжү-биле тудуп турары спортчу шөлдеринге, ат-алдар сесерлиинге болгаш Субурган тудуунга чораан.
Ында суурнуң улуг-бичии чону барык шупту идепкейлиг киржип турар болган. Кидин-түлүк ажылдаан чон-биле Кан-оол Тимурович ужуражып, ажылда кандыг бергедежиишкиннер барын сонуургап көрген.
Тыва Республиканың Дээди Хуралының (парламентизиниң) депутаттары Эрес Михайлович Хуурак, Херел Васильевич Кызыл-оол-биле кады хол бөмбүү ойнаар шөлдерни шалалаар манзалар-биле дузалаар болган.