Верховный Хурал (парламент) Республики Тыва

Официальный сайт search.png   vkontakte   facebook   twitter

Кан-оол Даваа Наадымда тыва хүрешке республика чемпионадының ажыдыышкынынга киришкен

16 августа 2016 - 14:06

Тыва Республиканың Наадым байырлалының түңнел кезээ болур тыва хүреш маргылдаазы Кызыл хоорайда «Хүреш» стадионга болуп эрткен.

Тыва Республиканың Баштыңының хүлээлгезин түр күүседип турар Шолбан Валерьевич Кара-оол, Тыва Республиканың Дээди Хуралының (парламентизиниң) Даргазы Кан-оол Тимурович Даваа болгаш байырлалдың хүндүлүг аалчызы Россияның Президентизиниң Сибирь федералдыг округта бүрүн эргелиг төлээзи Сергей Меняйло Тыва Арат Республиканың тургустунганындан бээр 95 чыл болган ою-биле болгаш малчыннарның байырлалы Наадымны уткуштур бүгү тыва чонга моон-даа соңгаар чаңгыс демниг, бедик чедиишкиннерлиг, аас-кежиктиг болурун күзеп, 228 шилиндек мөгелерниң хүрежиниң байырлыг ажыдыышкынын кылганнар.

Бо удаада база тыва мөгелер аарыкчыларынга катаптаттынмас солун, чараш хүрештерни бараалгаткан. 

17 харлыг аныяк мөге Баткар Баасан 18 харга чедир оолдар аразынга Наадымның үш дакпыр чемпиону болбушаан, улуг мөгелер аразынга база чедиишкинниг хүрежип, сес шыырак мөгелерниң аразынче бо удаа кирген. Бодунуң бедик деңнелдиг чараш хүрежи-биле аарыкчыларының хүндүткелин чаалап алган. Ылаңгыя Тыва Республиканың Арзылаң мөгези Сайын-Белек Түлүшче дидим халдаашкынны кылып, улуг мөгени каш катап октап ал чазып турда, стадион долу чон диңмиреп турган-биле дөмей болган. 

Ол ышкаш Өвүр кожууннуң аныяк мөгези Аңгыр Куулар база бодунуң кончуг шыырак онагларын ажып чорааш, сес мөгеге Тыва Республиканың Арзылаң мөгези Седен-Очур Кара-Салды октааш, дөрт шыырак мөгениң санынче кирип, Тыва Республиканың Начын мөгези атты чаалап алган. 

Түңнелинде Тыва Республиканың Начын мөгези Отчуржап Айдын үжүүрлешкен, Сайын-Белек Түлүш шүггеш, Наадымның ийи дакпыр чемпиону болган. 

Сенатор Мерген Дадар-оолович Ооржак, Тыва Республиканың Дээди Хуралында комитет даргазы Радислав Николаевич Наважап, Тыва Республиканың Хөй-ниити палатазының Даргазы Хонук-оол Доржуевич Монгуш, Тываның аныяктар херектери болгаш спорт талазы-биле сайыды Юрий Октяевич Ооржак, Кызыл хоорайның мэри Владислав Товарищтайович Ховалыг, Моол күрүнениң Чаан мөгези Дамиран Бумбаяр, хостуг хурешке делегей чемпионнары Виктор Алексеев база Борис Будаев олар Наадымның тиилекчилеринге шаңналдарны тывысканнар.



Возврат к списку