Көдээни база көдээ ажыл-агыйны сайзырадыр ажыл уламчылаар
Тыва Республиканың Дээди Хуралының депутады Эчис-Балдир Нурзаттыӊ Тываныӊ Баштыӊы Ш.В. Кара-оолдуӊ Дээди Хуралга айыткалынга хамаарыштыр бодалы:
– Тываның Баштыңы Ш.В. Кара-оолдуң бо чылгы Айыткалын республиканың чоокку чылдарда хөгжүлдезиниң программазы деп хүлээп көрдүм. Ында экономиканың, социал адырның, культураның болгаш спорттуң айтырыглары долузу-биле кирген.
Бодум Эрзин соңгулда округундан депутат болгаш, көдээниң база көдээ ажыл-агыйның сайзыралының дугайында сорулгаларны онзалап дыңнадым. Республиканың чонунуң деткимчезин алган, оларны сорук киирген «Аныяк өг-бүлеге кыштаг», «Чаа сорук» болгаш «Чемгерикчи инээвис» деп губернатор төлевилелдери уламчылаар деп билдим.
Оларга үениң аайы-биле, чурттакчы чоннуң дилээ-биле эде көрүүшкүн болур-дур. «Аныяк өг-бүлеге кыштаг» деп төлевилелдиң чүгле ады өскерлир эвес, а киржикчилериниң назы хары база 55 хар чедир өзер. Чүге дизе, көдээ ишчилер ол айтырыгны улуг улуска база таарымчалыг кылдыр көөрүн дилеп эгелээн. Баштыңывыс ону өөренип көргеш, чаа бот-идепкейлиг саналдарны кииргени онзагай.
Республиканың чурттакчылары Тываның Баштыңының Айыткалында эгелекчи, боттуг саналдарын деткииринге бүзүрелдиг мен. Депутат кижи болгаш, салдынган сорулгаларны боттандырарынга киржирим албан.