Коңгар-оол Ондарның чырык адынга тураскааткан сактыышкын кежээзи Кызылга эрткен
Бөгүн Тываның үндезин культура төвүнге РФ-тиң алдарлыг артизи, ТР-ниң улустуң хөөмейжизи Коңгар-оол Борисович Ондарның чырык адынга тураскааткан сактыышкын кежээзи болган.
Аңаа ТР-ниң Дээди Хуралының депутаттары – Байбек Надажапович Монгуш, Олег Доржулдаевич Сарыглар болгаш Седен-Очур Павлович Кара-Сал олар киришкен.
Делегейде билдингир тываларның бирээзи – тыва чоннуң эң төлептиг оглу Коңгар-оол Борисович Ондар бистиң аравыска чораан болза бөгүн 60 харлап турар. Ол шору эр апарган үезинден эгелээш, тыва үндезин культураның хөгжүлдезинге, тыва улустуң хөөмей-сыгыдын делегейге нептередиринге канчаар-даа аажок улуг үлүг хуузун киирген. Бөмбүрзектиң хөй-хөй чурттарының хүндүлүг аалчызы, тыва аныяк өскенниң башкызы, деткикчизи, сүмелекчизи чораан.
«К.Б. Ондар республикада көскү политик база чораан. Ол 1998-2002 чылдарда Тыва Республиканың Дээди Хуралының (парламентизиниң) ийиги чыыжының депутадынга соңгуткаш, чоннуң эрге ажыктарын, тыва культураның хөгжүлдезин хоойлужулуга органынга төлептиг камгалап чораан. Ол дээрге чүгле республикага эвес, а чуртка амыр эвес үе-ле болгай.
Коңгар-оол Борисович янзы-бүрү айтырыглар шиитпирлээнде мерген угааныы, быжыг туружу, чайгылыш чок чоруу-биле эш-өөрүнүң, чонунуң хүндүткелин чаалап алган чораан. Аңаа тыва чонунуң хандыкшылы кызыгаар чок турган. Ооң ажык чаңы, чараш үнү, чымчак хүлүмзүрүү чонунуң чүрээнде мөңгеде арткан» - деп, Олег Сарыглар чугаалаан.
Депутаттар сактыышкын кежээзиниң киржикчилеринге улуг артизивистиң юбилейи-биле байыр чедиргеннер.