Бай-Тайгага Иелер шуулганы болуп эрткен
Дүүн, апрель 15-те, Бай-Тайганың төп Культура бажыңынга Россияда өг-бүле чылынга тураскааткан «Буянны ынак сеткил-биле кыл» деп Тываның иелериниң VI шуулганының кожуун чадазы болуп эрткен.
Дээди Хуралдың деткимчези база хайгааралы-биле эртип турар бо чылгы шуулганны тускай шериг операцияда киржип турар дайынчыларның иелеринге, оларның өөнүң иштилеринге болгаш маадырларга ачы-дуза чыылдаларынга идепкейлиг киржип турар чаңгыс чер чурттугларынга тураскааткан.
Шуулганның ажылынга Бай-Тайга кожууннуң удуртукчуларындан аңгыда, ТР-ниң Дээди Хуралының депутады Айдын Монгуш киришкен. Ол чыылганнарга байыр чедиргеш, тускай шериг операция үезинде маадырлыы-биле амы-тынын берген чаңгыс чер чуртуу дайынчыларның болгаш эки турачыларның ада-иелеринге, бүгү-ле херээжен улуска мөгейген. Ачы-дуза чедирилгезинге шылгараан чурттакчыларга Дээди Хуралдың, Бай-Тайга кожууннуң шаңналдарын тывыскан.
Чыылганнарга шериг-патриотчу темага солун концертти кожууннуң бот-тывынгыр артистериниң болгаш школачы талантыларның күжү-биле организастаан.