Тыва-моол удуртукчулар хүреш көргеннер

28 мая 2018 - 05:19

Май 26-да Моол күрүнениң Увс аймааның Тывада болуп эртип турар хүннеринге тураскааткан тыва хүреш маргылдаазы болуп эрткен.

Маргылдааның байырлыг ажыдыышкынынга Тыва Республиканың Баштыңы Шолбан Валерьевич Кара-оол, Тыва Республиканың Дээди Хуралының (парламентизиниң) Даргазы Кан-оол Тимурович Даваа, Увс аймактың губернатору Дайвийням Батсайхан болгаш Увс аймактың Төлээлекчилер хуралының Даргазы Эвэлсурэн Насанбат киришкеннер.

Чүс-чүс чылдар дургузунда кожа-хелбээ чурттап келген чоннарның аразында найыралды моон-даа соңгаар улам быжыглап, садыг-саарылганы сайзырадып, кады демниг ажылдаар күзелдерин илереткен чылыг чымчак сөстерин ийи чурттуң удуртукчулары солушкан соонда, моол хөгжүмчүлерниң оюн-көргүзүглери-биле 64 мөгениң тыва хүреш маргылдаазы ажыттынган.

Моол күрүнениң 12 шыырак мөгелериниң киржилгези-биле болган хүрешти сонуургаан чонга үзүк чок чагган чаъс-даа моондак болуп шыдаваан.

Түңнелинде Тыва Республиканың Начын мөгези Айдың Отчуржап шүүлген, Тыва Республиканың эң аныяк Начын мөгези Баткар Баазан үжүүрлешкен. Моол күрүнениң Төп аймааның Арзылаң мөгези биле Тыва Республиканың Начын мөгези Начын Монгуш үшкү-дөрткү черлерни үлешкеннер.

Возврат к списку