Кан-оол Даваа тыва хүрештиң аарыкчыларынга байырын чедирген
Бөгүн, декабрь 22-де, Тыва Республиканың Дээди Хуралының (парламентизиниң) Даргазы Кан-оол Тимурович Даваа Чөөн-Хемчик кожууннуң шаңналы дээш болуп эрткен ай хүрежинге хүндүлүг аалчы болуп четкеш, тыва хүрештиң аарыкчыларынга болгаш мөгелерге Тыва Республиканың Чазааның Баштыңы Шолбан Валерьевич Кара-оолдуң болгаш бодунуң өмүнээзинден үнүп орар чаа чыл байырлалының бүдүүзү-биле изиг байырын чедирип, чаа үнүп келир чылда ал-боттарывысты хүндүлежип, аравыста найыралдыг, эптиг-демниг чоруурун болгаш кижи бүрүзүнге амыр-тайбың аас-кежиктиг амыдыралды йөрээп, мөгелерге спортчу чедиишкиннерни күзээн .
Хүрештиң баштайгы кезээ 85 килограммга чедир деңзилиг мөгелерге Шойдуң Субудай биле Балдаң Сайын үшкү-дөрткү черлерни ээлээн. Чөөн-Хемчик кожууннуң аныяк мөгези Радомир Куулар Тыва Республиканың Начын мөгези Алдын-Сай Одай-биле үжүүр былаашкан.
Улуг деңзилиг мөгелерниң хүрежинге Тыва Республиканың Чаан мөгези Сайын-Белек Түлүш шүүлген, Тыва Республиканың Начын мөгези Алдын-Сай Одай үжүүрлешкен. Үшкү-дөрткү черлерни Март-оол Доржукай биле Кызыл-Кат Кенден үлешкеннер.
85 килограммга чедир деңзилиг мөгелерге шүүлгеш, улуг мөгелерге үжүүрже киир хүрешкен Тыва Республиканың Начын мөгези Алдын-Сай Одайга Тыва Республиканың спорт болгаш күш-культура яамызының сайыды Субудай Радиславович Монгуш эки чараш хүрешкени дээш, бодунуң тускай шаңналын тывыскан. Шак ындыг шаңналды кышкы үеде кожууннарның ай санында эрттирип турар хүрештеринге шүгген мөгелерге немей тыпсырын дыңнаткан.
Дараазында хүрешти чаа үнүп келир чылдың январь 26-да Сүт-Хөл кожууннуң төлээлери эрттирер болган.