“Мээң ачам – Афганчы, мээң акым – Афганчы” деп чогаадыг мөөрейин түңнээн
Бөгүн, март 28-те, “Алдан-Маадыр” аттыг чурт-шинчилел музейинге Афганистандан Совет шериглерни үндүргенинден тура 30 чыл болган оюнга тураскааткан республика чергелиг школачылар аразынга болган “Мээң ачам – Афганчы, мээң акым – Афганчы” деп чогаадыг мөөрейиниң түңнел кезээ болган.
Мөөрейге киришкен хөй-хөй ажылдардан эң шылгараңгай бооп бирги черни алган Кызыл хоорайның 11 дугаар ортумак школазының өөреникчизи Белек Монгушка, ийиги черни алган Виктория Опайга, үшкү черге төлептиг болган Рустам Очур-оолга болгаш Айсана Ооржакка хүндүлүг бижиктерни болгаш янзы-бүрү өртектиг белектерни Тыва Республиканың Дээди Хуралының (парламентизиниң) депутады Юрий Валерьевич Кара-оол тывыскан.
Шак ол ышкаш Тыва Республиканың Афган дайынының киржикчилеринге үргүлчү дузалажып, оларның ажыл-ижинге үлүг-хуузун киириштирип чоруурларга база “Хартыга” деп дайынчы-патриоттар организацияларының Ассоциациязының мурнундан өөрүп четтириишкинни илередип, хөрек демдектерин тывыскан.