Күш-ажыл хоочуннарынга – халас телеприставкалар
Улуг-Хем кожууннуң чурттакчызы Сергей Донгактан мындыг чагаа тыва парламентиге келген. Ону силерге таныштырар-дыр бис.
«Сөөлгү үеде бөдүүн аналогтуг телевидениеден бүгү чурт үнүп, 20 каналдыг чурагайлыг телевидениеже кирип эгелээн. Тывада тускай телеприставка чок кижилерни тодарадып, оларга дузаламчы акцияларны чарлап турарын көргеш, амы-хууда магадап турдувус. Ол приставкаларның садыгларда өртээ 2 муң рубль. Эвээш-эреңгей бюджеттиг өг-бүлелерге ол арай аар өртек болуп турар.
Май 4-те бажың чанында олурар сандайга Юра Монгуш-биле хөөрежип олурувуста, даштыкы ак машина чанывыска тура дүштү. Оон үнүп келзе-ле, Тыва Республиканың Дээди Хуралының (парламентизиниң) Даргазы, «Чаңгыс демниг Россия» партияның Тывада даргазы Кан-оол Тимурович Даваа болду. Дарга мендилешкеш, ажыл-амыдырал дугайында каш сөс солушкан соонда, «20 каналдыг чурагайлыг телевидение көрүп тур силер бе?» – деп, айтырды. «Чок, приставкадан чоорту садып алгаш, көрүп турар ыйнаан» - деп, харыыладывыс. Оон Кан-оол Тимурович: «Ындыг болза, акыларым, «Чаңгыс демниг Россия» партия бөдүүн чонга 20 каналдыг телевидение көөр приставкалар бээр ачы-дуза акциязы чорудуп турар чүве. Тиилелге хүнү таварыштыр бо приставкаларны партияның мурнундан силерге сөңнеп тур мен» дээш, бис ийиге приставкаларны тудускаш, байырлашкаш чорупту.
Бис ийиниң өөрүшкүвүстү чүге деңнээр! «Чыткан теве аксынче каңмыыл кирген» деп чүве бо эвеспе?
«Чаңгыс демниг Россия» партияның Дээди политиктиг чөвүлелиниң кежигүнү, Тываның Баштыңы Ш.В. Кара-оолга, ТР-ның Дээди Хуралының Даргазы К.Т. Даваага өөрүп четтиргенивисти илередип тур бис!».
Сергей ДОНГАК.