Күрүне талазындан деткимче турда, кызып ажылдаар бис
Тыва Республиканың Дээди Хуралының депутады Айдың Монгуштуң Тываның Баштыңы Ш.В. Кара-оолдуң Айыткалынга хамаарыштыр бодалы:
– Сайгарлыкчы кижи болгаш, Баштыңның бизнеске хамаарыштыр чугаазын кончуг кичээнгейлиг дыңнадым. Шынап-ла, кайы-даа үеде хөгжүлдениң шимчедикчилери сайгарлыкчылар болур.
Коронавирус хамчыы тывылган соонда, улуг-биче бизнес карылгалыг ажылдап эгелээн. Шынын чугаалаар апаар – берге үеде Баштыңывыс Ш.В. Кара-оол, Дээди Хурал болгаш Чазак сайгарлыкчыларны дыка деткип тур. Бодап-даа көрүңер даан, биче азы ортумак хемчээлдиг чүс-чүс сайгарлыкчыларга каш-ла ай иштинде 1,5 млрд. рубльдиң деткимчезин республика бюджединден көргүскен. Ол дээрге, тулган деткимче-дир!
Тываның Баштыңының саналы-биле Дээди Хурал регион чергелиг чамдык үндүрүглерни чиигеткен. Ол база сайгарлыкчыларга улуг деткимче болур. Бо берге үеде бистиң Чазаавыс сайгарлыкчыларга хамаарыштыр шалыпкын, чөптүг ажылды чорудуп тур. Бо бүгү хемчеглер Шолбан Кара-оолдуң Дээди Хуралга Айыткалында илереттинген. Күрүне талазындан деткимче турда, кызып ажылдавайн канчаар, ам-даа ажылдаар бис.